منتديات سات31: ||◄مـَقـُهـــــى التـ(01)ـعـُارفَ جدد ►||▌ القدس عاصمة ابدية لفلسطين

تخصصات لمّة العيد...
يوميات العيد فى ليبيا
وكل فرد من العيله له حكايه فى العيد
...
لمّة عيد الأضحى تختلف عن أيّ لمّة في أي مناسبة أخرى، في هذا اليوم المبارك غالباً ما يكون بيت الوالد أو الجد مُلتقى الكل، تتوزع المهام بين الكبار والصغار، الرجال والنساء ولا تكاد ترى أحد منهم خالي اليدين، وفي لحظات تسري روح النشاط بين الكل، فهذا يسلخ وذاك يقطّع والآخر يشوي، وسفر الشاي والقهوة والعصائر والحلويات تمر على الكل في جو عائلي دافئ.
...
التخصصات...
1- الخبير...
هذا يومه اللي يراجي فيه، خبرة في الذبح والسلخ والتقطيع، نشاط وهمّة وتوجيهاته ما تنتهي بالذات للجماعة الجدد اللي أول مرة يذبحوا أو يسلخوا، اللي يُحصل في حاجة يرجعله وهو طبعاً مش مقصّر لأنه هذا ملعبه منذ سنين.
...
2- صاحب الشواء...
هذا تخصصه كل عام الشواء وبس، يجهز العدّة ويولّع النار ويبدأ يجيه اللحم من السقايط وهو يبدأ في طرحات الشواء، واللي يجهزه يحطه في سفرة مع الطماطم والليم والخبزة ويبدأ في التوزيع، وديما ما يسلم من الانتقاد ولازم ينسى حد ما يعطيه.
...
3- الجديد...
الكل يتفلسف عليه ويعطي فيه دروس، لا مش هكي يشدو الموس، مش هكي يسلخوا، مش هكي يقطّعوا، وآخر حاجة يقولوله أحسن حاجة خليك تشد الرجلين، ويحسسوه كأن العملية تحتاج لخبراء دوليين واخذين نوبل في الذبح والسلخ.
...
4- الجنتل...
هذا قصته قصة، ما حد ينوضه بكري، يصحا سعادته لما تكثر عليه الدوشة، يعيّد على الجماعة من بعيد باش ما يشوهه حد، ما يخش في كل الحوسة هادي، تخصصه مواصلات عامة، كانا يبوه يجيب حاجة او يرفع الكناسة يلوحها، يسوق بس، وأول حاجة يسأل عليها وين الشواء.
...
5- الطيب...
الكل ينادي عليه، والكل يخدّم فيه، وديما حاصل في البطون ينظف ويغسل، وما يقول لا ولا يتأفف أبداً، يدبّسوا فيه في شوي الرؤوس وغسل الجلود وتنظيف الجنان والحيوط، أول من يخش في الحوسه وآخر من يطلع منها، وآخر من يوصل فيه الدور في الشواء هذا كانا لحق عليه.
...
...
7البركة
الأب أو الأم أو الجد، واخد كرسي ومقعمز، ومداير جو الاشراف على الكل، بقدر ما يوجّه ويعطي في تعليمات ومرات تكشيخات، بقدر ما هو فرحان ومبسوط من قلبه بـ هاللمة الحلوة، وهو يشوف في أولاده يد وحدة في كل شيء، واحفاده يسعو بين ايديه غير شن يبي بس.
...
كل عام وأنتم جميعاً بألف خير
ودمتم بخير